الكلمة جباره
بتلسع قلب اللي يفهمها
وتحمي اللي يتحكم في أوصالها
وتجرح كل إنسان يفتكرها رساله واجبه يوصلها
الكلمه سناره
طُعمها منها فيها مش منا
بتصيدنا .. توجهنا .. تفرحنا .. تألمنا
واحنا بعباطه بنروح وراها فين ما ترسي لنا
الكلمه مطاطه
بتسعدنا للحظه وتشقينا من غير ملاحظه
وإن لاحظنا .. لازم نخفاف من فظاظه
وننحني .. منحاولش نقول لماذا
واللهم يبتلينا .. والجرح يسري فينا كأنه غرغرينا
الكلمه شعنونه
ساعه نلاقيقيها رقيقه .. وساعات كتير مجنونه
وساعات ما بيأثرش فيها الوجع
بتوصل للي يسمع .. واللي يسمع من غير سمع
كأنها هوا .. أو نغمه حروفها معجونه بدلع
الكلمه
أعظم شئ في الدنيا
بيها لا بد نفهم ونتعلم .. بيها لا بد نعرف ونتكلم
ونقول الصح صح .. والحق حق
والبادي بالشر أظلم
الكلمه مارد
مخنوق في قلوبنا وحناجرنا
حروف من نار لو تنطلق تكوي مشاعرنا
تحسسنا بكرامتنا .. تفكرنا بنخوتنا
تفجر فينا الكبرياء اللي تاه من عروبتنا
الكلمه
هي فين الكلمه .. ضاعت .. يا مصيبتنا
حتى الكلمه .. مش مصدقين ان بحروفها
نقدر نعبر عن ضيقتنا
مش قادرين نخليها سلاح يحمي قضيتنا
جتنا وكسه .. شايله نكسه .. بألف جرسه
فهمنا ولا .. عُمي لسه
الكلمه نعمه
هدانا بيها الرحمن .. نكتبها ونقولها في كل مكان
ما نخفش إلا منه وحده .. نتحدى بيها أي شيطان
يا نقيم هامتنا ونعيد ناسنا ورايتنا
أو نموت في الميدان
قبل ما يتهد فوق راسنا بيتنا
أو نفضل عايشين في الهوان
