عجبى عليك يابن آدم وانت ماشى فى دنيتك ..
تبدأ حياتك بالبكا ..
وناس كتير حواليك سعيدة ..
عمالة توصف سحنتك ..
ده شكل أبوه .. لأ شكل أمه ..
طالع يا روحى لعمتك ..
وتفوت سنين وانت ضعيف ..
محتاج لحد يأكلك ويسكتك ..
وسنين كمان لما تفوت ..
تكبر وتبقى بصحتك ..
تبدأ تدور فى الحياة على سكتك ..
تلقى حاجات بتفرحك ..
وألف حاجة تموتك ..
ودمعتك .. كتير تدارى ضحكتك ..
وسنين كتيرة تفوت كمان ..
شعرك يشيب قبل الأوان ..
تبدأ نهاية قصتك ..
وسنين كمان تفوت أوام ..
تقول خلاص مسك الختام ..
وتروح تجهز تربتك ..
عجبى عليك يابن آدم وانت ماشى ف الدروب ..
ساعات تتوه فيها وساعات ..
تمشى على أدك يادوب ..
وحييجى يوم راح تنطفى شمسك وتغرب ..
زى شمس الغروب ..
وحتبقى ذكرى ف القلوب ..
وصورة تانية جوه ألبوم الصور ..
أو ع الحيطان متعلقة ..
ويا ريتها خالية م العيوب .
