"وقلت ارسم"
.
.
وقلت ارسِم شطوط الحلم مش زرقة
وورد جنينة العشاق بيتمختر على الورقة...وبالألوان
وليل نعسان_ماهوش صاحي
وكلمة أيوة مش لأه
وهم تقيل بلون غامق
بيتعكّز على الأيام...وبيـفارق
وقوة عشان طروف الموج ما تتكسر
وطيبة عشان قساوةِ الريح دي تتبعتر
وفرحة عشاني وعشانَك
وضحكة خطوطها بالأبيض
لكن ألواني عاصياني_ومش راضية
أوام ما اللُّون بِيِطرح طرحه وبيِرسم
يلم خطوطه ويهاجر منِ الورقة
دي ألواني أكيد حاسه بخطر هاجـِم!!
ولسه يدوب بقول الكلمة واستغرب!!
والاقي ضلامه بيشقشق على اللوحة
ويتمنظر
وجوه خطاوي بـِتقرب
بيصبغ كل رسماتي
ويملا الحالي والآتي
بصوت مسموع
أنا الإسود
أنا صاحي ومش نايم
أنا سيـِدهم وسايدهم
مفيش نحلم
مفيش نرسم
مفيش ألوان
[b]
